इंदूरच्या मराठी वारसा फेस्टिव्हलमध्ये आष्टीच्या ‘मोदकाच्या आमटी’चा डंका!
५० हून अधिक खाद्यपदार्थांवर मात करत आष्टी तालुक्याने पटकाविले प्रथम पारितोषिक; केशरबाई सिदनकर आणि सुप्रिया मेहकर यांच्या पाककलेचा गौरव

आष्टी (प्रतिनिधी) महाराष्ट्राच्या समृद्ध खाद्य संस्कृतीचा आणि पारंपरिक पाककलेचा गौरव करणाऱ्या इंदूर येथील तीन दिवसीय ‘मराठी वारसा फेस्टिव्हल’मध्ये आष्टी तालुक्याने आपल्या अस्सल मराठमोळ्या चवीची छाप उमटवत प्रथम पारितोषिक पटकाविले आहे. ५० हून अधिक पारंपरिक खाद्यपदार्थांची रेलचेल असलेल्या या महोत्सवात आष्टी शहरातील प्रसिद्ध ‘मोदकाची आमटी’ सर्वांचे लक्ष वेधून घेत विजेती ठरली. या यशामुळे आष्टीच्या पारंपरिक खाद्यसंस्कृतीचा नावलौकिक इंदूरपर्यंत पोहोचला आहे.

आष्टी शहरातील प्रसिद्ध खानावळ म्हणून ओळखल्या जाणाऱ्या यशोदीप खानावळीच्या संस्थापिका केशरबाई सिदनकर आणि त्यांची कन्या सुप्रिया मेहकर यांनी या स्पर्धेत सहभाग घेतला होता. त्यांनी आष्टीची खास ओळख असलेली मोदकाची आमटी तयार करून सादर केली. महाराष्ट्राच्या विविध भागांतील खाद्यपदार्थांनी सजलेल्या या महोत्सवात आष्टीच्या या पारंपरिक पदार्थाने परीक्षकांची मने जिंकत प्रथम पारितोषिकावर आपले नाव कोरले.

महाराष्ट्राच्या खाद्यपरंपरेत प्रत्येक प्रदेशाची स्वतंत्र चव आणि वैशिष्ट्य आहे. खान्देशातील झणझणीत पदार्थ, मराठवाड्यातील पारंपरिक खाद्यसंस्कृती, कोकणातील नारळाचा वापर आणि पश्चिम महाराष्ट्रातील विविध रुचकर पदार्थ अशा अनेक पाककृतींचे दर्शन या फेस्टिव्हलमध्ये घडले. तब्बल ५० हून अधिक खाद्यपदार्थांच्या उपस्थितीत आष्टीच्या मोदकाच्या आमटीने मिळविलेले यश विशेष महत्त्वाचे ठरले आहे.आष्टीच्या मोदकाच्या आमटीला केवळ एक खाद्यपदार्थ म्हणून नव्हे, तर स्थानिक परंपरा आणि पाककलेचा वारसा म्हणूनही विशेष महत्त्व आहे. पिढ्यान्‌पिढ्या जपल्या गेलेल्या या चवीला मोठ्या व्यासपीठावर मान्यता मिळाल्याने आष्टीकरांसाठी हा अभिमानाचा क्षण ठरला आहे. केशरबाई सिदनकर यांनी आपल्या अनुभवातून जपलेली पाककला आणि सुप्रिया मेहकर यांनी दिलेली साथ यामुळे आष्टीच्या या पारंपरिक पदार्थाला महोत्सवात विशेष ओळख मिळाली.इंदूरच्या मराठी वारसा फेस्टिव्हलमधील या यशाने आष्टीच्या खाद्यसंस्कृतीचा गौरव वाढविला असून, स्थानिक पारंपरिक पदार्थांनाही राज्याबाहेरील व्यासपीठावर मान्यता मिळू शकते, हे अधोरेखित केले आहे.