सोयाबीन शेतात महाकाय अजगर! शेतकऱ्यांनी सतर्क राहावे - कृषी शास्त्रज्ञ डॉ. अशोकराव ढगे यांचे आवाहन

*नेवासा (प्रतिनिधी):* सध्या सोयाबीन पीक जोमात असून, शेतात दाट सावली तयार झाली आहे. अशा परिस्थितीत वन्यप्राण्यांचा वावर वाढला असून, शेतात काम करताना शेतकऱ्यांनी अत्यंत काळजी घेण्याची गरज आहे. नुकताच एका सोयाबीनच्या शेतात पाणी देताना महाकाय अजगर (Python) आढळून आल्याचा व्हिडिओ समोर आला आहे. सुदैवाने कोणतीही जीवितहानी झाली नाही.

याबाबत कृषी शास्त्रज्ञ डॉ. अशोकराव ढगे यांनी शेतकऱ्यांना सतर्कतेचा इशारा दिला आहे.

डॉ. ढगे म्हणाले की, "गेल्या काही दिवसांपासून नेवासा तालुक्यात, विशेषतः गोदावरी आणि प्रवरा संगम परिसर - टोका, वाशिम, भालगाव भागात बिबट्या, रानडुकरे आणि अजगर यांचा वावर वाढला आहे. सोयाबीन, ऊस यासारखी दाट पिके त्यांना लपण्यासाठी सुरक्षित वाटतात. शेतकरी दिवस-रात्र शेतात कष्ट करतात, त्यामुळे त्यांच्या सुरक्षेसाठी शासनाने स्वतंत्र प्रकल्प राबवणे गरजेचे आहे, ही माझी जुनीच मागणी आहे."

*शेतकऱ्यांसाठी महत्त्वाच्या सूचना:*

1.  शेतात एकटे जाऊ नका, सोबत एक-दोन जण असू द्या.

2.  शेतात जाताना उंच गमबूटचा वापर करा.

3.  पिकांमध्ये जाताना काठीने हलका आवाज करत पुढे जा.

4.  अजगर हा बिनविषारी असला तरी अतिशय ताकदवान असतो. त्याला मारण्याचा प्रयत्न करू नका.

5.  साप किंवा अजगर दिसल्यास तात्काळ वनविभागाच्या *हेल्पलाईन 1926* वर किंवा स्थानिक सर्पमित्रांना संपर्क साधा.

या घटनेमुळे शेतकरी वर्गात भीतीचे वातावरण असून, वन विभागाने तातडीने पाहणी करून उपाययोजना कराव्यात अशी मागणी शेतकऱ्यांमधून होत आहे.

*- डॉ. अशोकराव ढगे, कृषी शास्त्रज्ञ, नेवासा*