Pune Crime News : रोजा सोडण्यासाठी जमलेल्या तरुणांवर जमावाचा हल्ला; पाच जखमी, १०–१५ जण ताब्यात

पुणे : रमजान महिन्यात रोजा सोडण्यासाठी इफ्तारीची तयारी करत असलेल्या मुस्लीम तरुणांवर जमावाने हल्ला केल्याची धक्कादायक घटना पुणे जिल्ह्यातील सासवड परिसरात घडली आहे. या घटनेत पाच तरुण जखमी झाले असून पोलिसांनी १० ते १५ संशयितांना ताब्यात घेतले आहे.

मिळालेल्या माहितीनुसार, सासवड पोलीस ठाण्याच्या हद्दीतील ऑस्करवाडी भागातील तलावाजवळ काही मुस्लीम तरुण रोजा सोडण्यासाठी इफ्तारीची तयारी करत होते. त्यावेळी अचानक सुमारे ५० जणांचा जमाव दुचाकींवरून तेथे आला. त्यांनी तरुणांकडे चौकशी करण्यास सुरुवात केली आणि त्यातून वाद निर्माण झाला.

वाद वाढताच जमावाने कथितरित्या त्या तरुणांवर हल्ला केल्याचा आरोप करण्यात आला आहे. या हल्ल्यात किमान पाच जण जखमी झाले. जखमींना उपचारासाठी जवळच्या रुग्णालयात दाखल करण्यात आले असल्याची माहिती पोलिसांनी दिली आहे.

घटनेची माहिती मिळताच पोलिसांनी तात्काळ घटनास्थळी धाव घेत परिस्थिती नियंत्रणात आणली. या प्रकरणी भारतीय न्याय संहितेच्या विविध कलमांखाली गुन्हा दाखल करण्यात आला असून १२ ते १५ संशयितांना ताब्यात घेण्यात आले आहे.

दरम्यान, या घटनेमुळे परिसरात काही काळ तणावाचे वातावरण निर्माण झाले होते. पोलिसांनी परिस्थिती नियंत्रणात असल्याचे सांगितले असून पुढील तपास सुरू आहे.