जामखेडमध्ये गावगुंड सागर मोहोळकर गोळीबारात गंभीर; तालुक्यात खळबळ

जामखेड प्रतिनिधी : जामखेड शहरातील जुनी कोठली रस्ता परिसरात आज धक्कादायक गोळीबाराची घटना सायं ७.३० च्या सुमारास घडली. स्थानिक पातळीवर गावगुंड म्हणून ओळखला जाणारा सागर मोहोळकर याच्यावर अज्ञात हल्लेखोरांनी जवळून गोळ्या झाडल्या. या घटनेमुळे जामखेड शहरासह तालुक्यात मोठी खळबळ उडाली आहे.

मिळालेल्या प्राथमिक माहितीनुसार, मोटारसायकलवरून आलेल्या दोन अज्ञात व्यक्तींनी सागर मोहोळकर याच्यावर जवळून ३ ते ४ गोळ्या झाडल्या. गोळ्या लागल्याने तो गंभीर जखमी झाला. रक्ताच्या थारोळ्यात पडलेल्या अवस्थेत त्याला तातडीने स्थानिक रुग्णालयात दाखल करण्यात आले. तेथून पुढील उपचारासाठी अहमदनगर येथील खासगी रुग्णालयात हलविण्यात आल्याची माहिती मिळाली आहे. त्याची प्रकृती चिंताजनक असल्याचे डॉक्टरांकडून समजते.

घटनेची माहिती मिळताच जामखेड पोलिसांनी तात्काळ घटनास्थळी धाव घेत पंचनामा केला. परिसरातील सीसीटीव्ही फुटेज तपासले जात असून हल्लेखोरांचा शोध घेण्यासाठी विशेष पथके नियुक्त करण्यात आली आहेत. जामखेड पोलीस ठाण्याचे वरिष्ठ अधिकारी स्वतः तपासावर लक्ष ठेवून आहेत.

गोळीबारामागील नेमके कारण अद्याप स्पष्ट झाले नसले तरी, जुन्या वादातून किंवा आपसी वैमनस्यातून हा प्रकार घडल्याची प्राथमिक शक्यता व्यक्त केली जात आहे. पोलिसांनी विविध ठिकाणी नाकाबंदी करून संशयितांचा माग काढण्याचे प्रयत्न सुरू केले आहेत.

या घटनेनंतर शहरात तणावपूर्ण वातावरण निर्माण झाले असून काही भागात पोलिसांचा बंदोबस्त वाढविण्यात आला आहे. नागरिकांनी अफवांवर विश्वास न ठेवता शांतता राखावी, असे आवाहन प्रशासनाकडून करण्यात आले आहे.

दरम्यान, सागर मोहोळकर याच्या पूर्वीच्या गुन्हेगारी पार्श्वभूमीचीही चौकशी सुरू असून सर्व बाजूंनी तपास केला जात आहे. या घटनेमुळे कायदा व सुव्यवस्थेचा प्रश्न पुन्हा ऐरणीवर आला आहे