इजरायल-अमेरिका आणि इराण तणावाचा इंटरनेट कनेक्टिव्हिटीवर परिणाम होण्याची शक्यता

जगभरात सुरू असलेल्या इजरायल-अमेरिका आणि इराणमधील तणावाचा परिणाम आता इंटरनेट सेवांवरही होऊ शकतो, अशी भीती व्यक्त केली जात आहे. विविध अहवालांनुसार, इराणने लाल समुद्रात (Red Sea) टाकण्यात आलेल्या इंटरनेट केबल्सना नुकसान पोहोचवण्याची धमकी दिल्याची चर्चा आहे. जरी इराणी अधिकाऱ्यांनी याबाबत अधिकृत पुष्टी केलेली नसली, तरी सोशल मीडियावर या विषयावर मोठ्या प्रमाणात चर्चा सुरू आहे.

नेमका धोका काय आहे?

मिळालेल्या माहितीनुसार, जर खाडी देशांनी अमेरिकन सैन्याला मदत सुरूच ठेवली, तर इराण इंटरनेट केबल्सना लक्ष्य करू शकतो, असा इशारा दिला गेला आहे. लाल समुद्रातून जाणाऱ्या या केबल्सद्वारे जगातील सुमारे 17 टक्के इंटरनेट ट्रॅफिक हाताळले जाते.

याच केबल्समुळे यूएई आणि सौदी अरेबियामध्ये असलेल्या मायक्रोसॉफ्ट, गूगल आणि अॅमेझॉनच्या एआय (AI) हब्सना कनेक्टिव्हिटी मिळते. जर या केबल्सना नुकसान झाले, तर अनेक महिन्यांपर्यंत इंटरनेट सेवांमध्ये अडथळे निर्माण होऊ शकतात. विशेष म्हणजे, मेटाच्या काही कंत्राटदारांनी आधीच फारसच्या आखातातून माघार घेतल्याची माहिती आहे.

केबल्स डॅमेज झाल्यास काय परिणाम होईल?

लाल समुद्रात फायबर ऑप्टिक केबल्सचे मोठे जाळे पसरलेले आहे, जे आशिया, युरोप आणि मध्य पूर्व (Middle East) यांना जोडते. या केबल्सद्वारे सुमारे 30 टक्के प्रादेशिक इंटरनेट ट्रॅफिक हाताळला जातो.

या कनेक्टिव्हिटीवरच आर्थिक व्यवहार, व्हिडिओ कॉल्स, ईमेल सेवा आणि एआय आधारित कामकाज अवलंबून असते. तसेच जगातील अनेक आधुनिक एआय इन्फ्रास्ट्रक्चर याच नेटवर्कवर चालते.

भारतावर काय परिणाम होईल?

जर या इंटरनेट केबल्सना नुकसान झाले, तर त्याचा परिणाम भारतावरही होण्याची शक्यता आहे. भारतात कोट्यवधी इंटरनेट वापरकर्ते आहेत. अशा परिस्थितीत इंटरनेट स्पीड कमी होणे, क्लाउड सेवा अडथळ्यांत येणे आणि डिजिटल व्यवसायांवर परिणाम होणे निश्चित आहे.

याशिवाय, जर नुकसान मोठ्या प्रमाणात झाले आणि दुरुस्तीसाठी जास्त वेळ लागला, तर ऑनलाइन व्यवहार, बँकिंग सेवा आणि क्लाउड इन्फ्रास्ट्रक्चरवर गंभीर परिणाम होऊ शकतो.

जागतिक तणावाचा परिणाम आता फक्त लष्करी किंवा राजकीय पातळीवरच नाही, तर डिजिटल जगावरही होण्याची शक्यता आहे. त्यामुळे येत्या काळात इंटरनेट सेवा आणि तंत्रज्ञान क्षेत्रासाठी ही परिस्थिती गंभीर ठरू शकते.