नाफेडमार्फत सोयाबीन,मूग,उडीद शासकीय हमीभावाने खरेदीसाठी ऑनलाईन नोंदणी सुरू - सभापती रमजान तांबोळी

**********************************

***********************************

आष्टी (प्रतिनिधी)

आष्टी तालुक्यातील शेतकऱ्यांसाठी दिलासादायक निर्णय झाला असून लोकनेते आमदार सुरेश धस यांच्या विशेष प्रयत्नांमुळे कडा कृषी उत्पन्न बाजार समिती येथे नाफेड अंतर्गत आधारभूत किंमत खरेदी योजना २०२५-२६ सुरू करण्यात आली आहे. या योजनेअंतर्गत सोयाबीन, मूग व उडीद या पिकांची शासकीय हमीभावाने खरेदी होणार असून, शेतकऱ्यांसाठी ऑनलाईन नोंदणी प्रक्रिया सुरू झाली आहे. नोंदणीची अंतिम तारीख ३१ डिसेंबर २०२५ असून, सर्व शेतकऱ्यांनी आवश्यक कागदपत्रांसह आपली नोंदणी पूर्ण करून घ्यावी, असे आवाहन कृषी उत्पन्न बाजार समितीचे सभापती रमजान तांबोळी यांनी केले आहे.

        या खरेदी केंद्रात पिकांसाठी खालील प्रमाणे  सोयाबीन ५३२८ प्रतिक्विंटल,उडीद ७८०० प्रतिक्विंटल, मूग ८७६८ प्रतिक्विंटल हमीभाव निश्चित करण्यात आला आहे.कडा कृषी उत्पन्न बाजार समितीअंतर्गत सेवा सहकारी सोसायटी लि.जामगाव ता. आष्टी या केंद्राला नाफेड अंतर्गत खरेदी केंद्र म्हणून मंजुरी मिळाली असून नोंदणीसाठी शेतकऱ्यांनी खालील कागदपत्रांसह प्रत्यक्ष उपस्थित राहावे ७/१२ व ८अ उतारा (ई-पिक पाहणीसह),आधारकार्ड,बँक पासबुक चालू खाते, जनधन खाते स्वीकारले जाणार नाही, शेतकऱ्याचे नाव सातबारावर असणे आवश्यक असून शेतकऱ्यांने स्वतः कागदपत्रासह उपस्थित राहणे अनिवार्य आहे.दि.१५ नोव्हेंबर पासून प्रत्यक्ष खरेदी सुरू होणार असल्याची माहिती सचिव हनुमंत गळगटे यांनी दिली आहे.

कडा कृषी उत्पन्न बाजार समितीचे सभापती रमजान तांबोळी म्हणाले,शेतकऱ्यांना हमीभावाने उत्पादन विक्रीची संधी मिळत असल्याने दिलासा मिळणार आहे. शेतकऱ्यांनी वेळेत नोंदणी करून या योजनेचा लाभ घ्यावा.