नगर-मुंबई प्रवास आता अवघ्या तीन तासांत; जनकल्याण द्रुतगती महामार्गाच्या कामाला वेग
ड्रोन सर्वेक्षण सुरू; ४४२ किमीचा सहापदरी महामार्ग, माळशेज घाटात ८ किमी बोगद्याचा प्रस्ताव

अहिल्यानगर (प्रतिनिधी ) -

अहिल्यानगर ते मुंबई हा प्रवास सध्या लागणाऱ्या वेळेच्या तुलनेत मोठ्या प्रमाणात कमी करून अवघ्या तीन तासांत मुंबई गाठता यावी, या उद्देशाने प्रस्तावित कल्याण-लातूर जनकल्याण द्रुतगती महामार्ग प्रकल्पाच्या हालचालींना वेग आला आहे. गेल्या दीड महिन्यापासून विविध भागांमध्ये ड्रोनच्या माध्यमातून सर्वेक्षणाचे काम सुरू करण्यात आले असून, या सर्वेक्षणामुळे महामार्गाच्या प्रत्यक्ष कामाच्या दिशेने महत्त्वाचे पाऊल पडले आहे.

४४२ किलोमीटरचा सहापदरी महामार्ग

प्रस्तावित जनकल्याण द्रुतगती महामार्गाची लांबी सुमारे ४४२ किलोमीटर असून तो सहापदरी असणार आहे. मुंबई, अहिल्यानगर तसेच मराठवाड्यातील विविध जिल्ह्यांना जलद आणि सुरक्षित वाहतुकीच्या माध्यमातून जोडणारा हा महत्त्वाकांक्षी प्रकल्प ठरणार आहे.

महामार्गाच्या प्रस्तावित मार्गिकेतील गावनिहाय नकाशे तयार करण्याचे काम सध्या सुरू आहे. ड्रोन सर्वेक्षणाद्वारे संबंधित परिसराची भौगोलिक परिस्थिती, जमिनीची रचना, उपलब्ध जागा आणि संभाव्य मार्गिका यांचा अभ्यास केला जात आहे.

सर्वेक्षणानंतर जमीन अधिग्रहणाची प्रक्रिया

ड्रोन सर्वेक्षणाचे काम पूर्ण झाल्यानंतर पुढील टप्प्यात जमीन अधिग्रहण प्रक्रियेला सुरुवात होण्याची शक्यता आहे. त्यामुळे प्रस्तावित महामार्गाच्या मार्गिकेत येणाऱ्या गावांमधील शेतकरी आणि जमीनधारकांचे या प्रकल्पाकडे विशेष लक्ष लागले आहे.

महामार्गासाठी आवश्यक जमीन, मार्गिका आणि बांधकामाची ठिकाणे निश्चित करण्यासाठी सध्याचे सर्वेक्षण महत्त्वाचे मानले जात आहे.

माळशेज घाटात आठ किलोमीटरचा बोगदा

या प्रकल्पाचे आणखी एक वैशिष्ट्य म्हणजे माळशेज घाट परिसरात सुमारे आठ किलोमीटर लांबीचा अत्याधुनिक बोगदा प्रस्तावित करण्यात आला आहे. घाटातील अवघड भौगोलिक परिस्थिती लक्षात घेता या बोगद्यामुळे वाहतूक अधिक वेगवान आणि सुरक्षित होण्यास मदत होणार आहे.

३५ ते ३६ हजार कोटींचा खर्च

या महत्त्वाकांक्षी महामार्ग प्रकल्पासाठी अंदाजे ३५ ते ३६ हजार कोटी रुपये खर्च अपेक्षित असल्याचे सांगण्यात येत आहे. एवढ्या मोठ्या प्रमाणातील गुंतवणुकीमुळे महामार्गाच्या मार्गावरील भागांच्या आर्थिक विकासालाही चालना मिळण्याची शक्यता आहे.

व्यापार, उद्योग आणि शेतीला मोठा फायदा

मुंबईशी जलद संपर्क उपलब्ध झाल्यास अहिल्यानगर जिल्ह्यासह मराठवाड्यातील व्यापार, उद्योग, कृषी आणि पर्यटन क्षेत्राला मोठा फायदा होऊ शकतो. विशेषतः शेतकऱ्यांना आपला कृषीमाल मुंबईसारख्या मोठ्या बाजारपेठेत कमी वेळेत पोहोचवणे शक्य होईल.

औद्योगिक क्षेत्रासाठीही मुंबईशी जलद दळणवळण महत्त्वाचे ठरणार असून, नवीन उद्योग आणि व्यवसायांना चालना मिळण्याची अपेक्षा आहे. पर्यटनाच्या दृष्टीनेही अहिल्यानगर आणि मराठवाड्यातील विविध पर्यटनस्थळांना मुंबई व परिसरातील पर्यटकांसाठी अधिक सुलभ कनेक्टिव्हिटी मिळू शकते.

मराठवाड्यालाही मिळणार वेगवान पर्यायी मार्ग

जनकल्याण द्रुतगती महामार्गामुळे मराठवाड्यातील नागरिकांना मुंबईकडे जाण्यासाठी अधिक वेगवान पर्यायी मार्ग उपलब्ध होण्याची शक्यता आहे. त्यामुळे मुंबईशी असलेला प्रवासाचा वेळ कमी होऊन रोजगार, शिक्षण, व्यापार आणि आरोग्य सेवांसाठी मुंबईकडे जाणाऱ्या नागरिकांना मोठा फायदा होऊ शकतो.

१५ ते १८ महिन्यांचा कालावधी लागू शकतो

सर्वेक्षणानंतर अंतिम आराखडा तयार करणे, जमीन अधिग्रहण आणि इतर प्रशासकीय प्रक्रिया पूर्ण कराव्या लागणार आहेत. या प्रक्रिया पूर्ण झाल्यानंतर प्रत्यक्ष बांधकामाला सुरुवात होण्यासाठी अंदाजे १५ ते १८ महिन्यांचा कालावधी लागू शकतो, अशी माहिती आहे.

सध्या सुरू असलेल्या ड्रोन सर्वेक्षणामुळे या बहुप्रतिक्षित महामार्ग प्रकल्पाला प्रत्यक्ष गती मिळत असल्याचे चित्र आहे. अहिल्यानगर ते मुंबई प्रवासाचा वेळ तीन तासांपर्यंत आणण्याचे उद्दिष्ट प्रत्यक्षात आले, तर हा महामार्ग जिल्ह्याच्या विकासासाठी गेमचेंजर ठरू शकतो.