पंचशील ध्वज विटंबना प्रकरण: प्रशासनाच्या उदासीनतेविरोधात वंचित बहुजन आघाडी आक्रमक; लोहा तहसीलवर धडकणार तीव्र मोर्चा!

लोहा (चंद्रकांत वाघमारे)

लोहा येथील जायकवाडी वसाहतीमधील पंचशील ध्वज व विश्वशांती बौद्ध विहाराचा नामफलक समाजकंटकांनी काढून टाकल्याच्या निषेधार्थ वंचित बहुजन आघाडीच्या वतीने लोहा तहसील कार्यालयावर तीव्र धडक मोर्चा काढण्यात येणार आहे. क्रांतीसुर्य बौद्ध विहार येथे आयोजित करण्यात आलेल्या समाजबांधव आणि पदाधिकाऱ्यांच्या महत्त्वपूर्ण बैठकीत हा निर्णय घेण्यात आला. प्रशासनाने वेळेत कारवाई न केल्यास हे आंदोलन अधिक तीव्र करण्याचा इशारा यावेळी देण्यात आला.

३५ वर्षांचा इतिहास; समाजकंटकांचे कृत्य

लोहा येथील जायकवाडी वसाहतीमध्ये मागील ३५ वर्षांपासून पंचशील ध्वज आणि बौद्ध विहाराचा नामफलक सन्मानाने उभा होता. मात्र, काही दिवसांपूर्वी काही अज्ञात समाजकंटकांनी हा ध्वज आणि फलक बेकायदेशीरपणे काढून टाकल्याने संपूर्ण परिसरात तीव्र संताप व्यक्त होत आहे. या कृत्यामुळे बौद्ध समाजबांधवांच्या धार्मिक भावना दुखावल्या गेल्या आहेत.

प्रशासनाची उदासीनता आणि आंदोलनाचा पवित्रा

या घटनेनंतर वंचित बहुजन आघाडी आणि स्थानिक बौद्ध महासभेच्या वतीने तहसीलदारांना लेखी निवेदन देऊन दोषींवर तात्काळ कारवाई करण्याची आणि ध्वज पूर्ववत सन्मानाने उभारण्याची मागणी करण्यात आली होती. मात्र, अनेक दिवस उलटूनही प्रशासनाकडून कोणतीही ठोस पावले उचलली गेली नाहीत. प्रशासनाच्या या संथ आणि उदासीन कारभारामुळेच अखेर लोकशाही मार्गाने रस्त्यावर उतरून तीव्र संघर्ष करण्याचा निर्णय वंचित बहुजन आघाडीने घेतला आहे, अशी माहिती नांदेड दक्षिणचे जिल्हाध्यक्ष शंकर महाजन यांनी दिली.

बैठकीला प्रमुख नेत्यांची उपस्थिती

क्रांतीसुर्य बौद्ध विहार येथे झालेल्या या नियोजन बैठकीचे प्रास्ताविक माजी नगरसेवक पंचशील कांबळे यांनी केले. या बैठकीला वंचित बहुजन आघाडीचे नांदेड उत्तरचे जिल्हाध्यक्ष प्रा. राज आटकोरे, दक्षिण जिल्हाध्यक्ष शंकर महाजन, सरचिटणीस रवी पंडित तुप्पेकर, दीपक मगर, भारतीय बौद्ध महासभेचे माजी जिल्हाध्यक्ष पी. एम. वाघमारे आणि रत्नाकर महाबळे यांची प्रमुख उपस्थिती होती.

यासोबतच ज्येष्ठ सामाजिक कार्यकर्ते गंगाधर महाबळे, विनायक गजभारे, रंगनाथ गजले, कायदेशीर सल्लागार एड. जयपाल ढवळे, महिला आघाडीच्या अनिता सावळे, सपना खाडे आणि समता सैनिक दलाचे सिद्धार्थ ससाने यांच्यासह शेकडो कार्यकर्ते व महिला पदाधिकारी मोठ्या संख्येने उपस्थित होत्या.

प्रशासनाला थेट इशारा

"हा लढा केवळ एका चिन्हाचा नसून आमच्या अस्मितेचा आणि धार्मिक स्वातंत्र्याचा आहे. प्रशासनाने आमचा संयम पाहू नये. मोर्चाच्या माध्यमातून आम्ही आमचा तीव्र रोष व्यक्त करणार असून, जोपर्यंत न्याय मिळत नाही तोपर्यंत आंदोलन मागे घेतले जाणार नाही," असा इशारा उपस्थित नेत्यांनी एकमुखाने दिला आहे. या मोर्चात लोहा तालुक्यातील सर्व समाजबांधवांनी मोठ्या संख्येने सहभागी व्हावे, असे आवाहन वंचित बहुजन आघाडीच्या वतीने करण्यात आले आहे.