📰 Tejwarta| आष्टी प्रतिनिधी

नायब तहसीलदार भगीरथ धारक यांचे कार्य कौतुकास्पद – तहसीलदार वैशाली पाटील

आष्टी तहसील कार्यालयातील नायब तहसीलदार भगीरथ धारक यांनी आपल्या सेवाकाळात अत्यंत प्रामाणिकपणे, निष्ठेने व जबाबदारीने काम करत नागरिकांच्या मनात विशेष स्थान निर्माण केले आहे. त्यांच्या या उल्लेखनीय कार्याची दखल घेत तहसीलदार वैशाली पाटील यांनी त्यांचे मनापासून कौतुक करत त्यांच्या कार्यशैलीचे गौरवोद्गार काढले.

निवृत्तीच्या पार्श्वभूमीवर आष्टी तहसील कार्यालयात आयोजित करण्यात आलेल्या साध्या पण भावनिक सत्कार समारंभात भगीरथ धारक यांचा शाल, श्रीफळ व पुष्पगुच्छ देऊन सन्मान करण्यात आला. या कार्यक्रमाला तहसील कार्यालयातील अधिकारी, कर्मचारी तसेच मान्यवर मोठ्या संख्येने उपस्थित होते.

यावेळी बोलताना तहसीलदार वैशाली पाटील म्हणाल्या की, “भगीरथ धारक हे अत्यंत शांत, संयमी व मनमिळावू स्वभावाचे अधिकारी आहेत. त्यांनी आपल्या सेवाकाळात प्रत्येक काम अत्यंत जबाबदारीने व वेळेवर पूर्ण केले. कोणत्याही नागरिकाला त्यांनी कधीही अडवणूक केली नाही, उलट नागरिकांच्या समस्या समजून घेत त्यांचे त्वरित निराकरण करण्यासाठी ते नेहमी तत्पर राहिले.”

तसेच त्यांनी पुढे सांगितले की, आष्टी तालुका मोठा असल्यामुळे अनेक नागरिक दूरवरून आपल्या कामासाठी तहसील कार्यालयात येतात. अशा वेळी धारक यांनी नेहमीच नागरिकांना प्राधान्य देत त्यांची कामे मार्गी लावण्यावर भर दिला. त्यांच्या कार्यपद्धतीमुळे कार्यालयीन वातावरण अधिक सकारात्मक व लोकाभिमुख झाले.

कार्यक्रमादरम्यान भगीरथ धारक यांनीही आपल्या भावना व्यक्त करताना सांगितले की, “मी माझ्या सेवाकाळात मनापासून व प्रामाणिकपणे सेवा केली. काम करताना लोकांशी नातं जोडण्याचा प्रयत्न केला. सहकाऱ्यांचे सहकार्य व वरिष्ठांचे मार्गदर्शन यामुळेच मी हे कार्य यशस्वीपणे पार पाडू शकलो.” त्यांनी आपल्या सहकाऱ्यांचे व उपस्थित मान्यवरांचे आभार मानले.

या प्रसंगी सहायक महसूल अधिकारी, लिपिक वर्ग, मंडळ अधिकारी व इतर कर्मचारी मोठ्या संख्येने उपस्थित होते. उपस्थितांनी आपल्या भाषणातून भगीरथ धारक यांच्या कार्याचा गौरव करत त्यांच्या पुढील आयुष्यासाठी शुभेच्छा दिल्या.

संपूर्ण कार्यक्रमात एक भावनिक वातावरण निर्माण झाले होते. भगीरथ धारक यांच्या सेवाभावी कार्यामुळे त्यांची एक आदर्श अधिकारी म्हणून ओळख निर्माण झाली असून, त्यांच्या कार्याची आठवण कायम राहील, अशी भावना उपस्थितांनी व्यक्त केली.