चिमुकल्या हातांनी पेटवली माणुसकीची ज्योत 
----------------- 
रावेतमधील विद्यार्थ्यांकडून देहूतील विशेष मुलांसाठी संवेदनशील उपक्रम

------------------

राजेंद्र जैन / पुणे 

---------------

रावेत येथील सोनिगरा प्रेसिडेन्सी, मस्के वस्ती या सोसायटीतील विद्यार्थ्यांनी सामाजिक जाणिवेचे सुंदर उदाहरण घालून देत देहू परिसरातील वात्सल्य शिक्षण संस्थेच्या निवासी पुनर्वसन केंद्राला मदतीचा हात दिला. निरपेक्ष भावनेतून एकत्र आलेल्या या बालगोपाळांनी जुनी वर्तमानपत्रे, पुस्तके, वह्या, स्क्रॅप पेपर तसेच किराणा साहित्य गोळा करून संस्थेला अर्पण केले.

पुणे जिल्ह्यातील देहू परिसरातील मानसिकदृष्ट्या विशेष मुलांसाठी कार्य करणारी वात्सल्य शिक्षण संस्था मुलांना स्वावलंबी बनवण्यासाठी सातत्याने प्रयत्नशील आहे. विविध कौशल्यांचे प्रशिक्षण देत त्यांच्या आयुष्यात आत्मविश्वास निर्माण करणे आणि त्यांना भविष्यात रोजगाराच्या संधी उपलब्ध करून देणे हा संस्थेचा प्रमुख हेतू आहे.

या उपक्रमात विद्यार्थ्यांसोबतच पालकांनीही उत्साहाने सहभाग घेतला. मुलांच्या मनातील सहानुभूती, जिव्हाळा आणि समाजाप्रती असलेली जबाबदारी यांचे भावनिक दर्शन घडले. छोट्याशा प्रयत्नातून मोठा आनंद देण्याची ताकद या उपक्रमाने अधोरेखित केली.

सोनिगरा प्रेसिडेन्सीतील विद्यार्थ्यांच्या या उपक्रमाचे वात्सल्य संस्थेकडून मनापासून स्वागत करण्यात आले. या कृतीतून माणुसकीची नाळ अधिक दृढ होत असल्याचे स्पष्ट झाले असून, समाजात संवेदनशीलतेचा प्रकाश अधिक उजळवण्याचे कार्य या चिमुकल्यांनी केले.

-------%-------