म्हाडा परीक्षेत पुन्हा गैरप्रकार...?
परीक्षा केंद्रावरील व्हिडिओ व्हायरल,
एमपीएससी समन्वय समितीचा गंभीर आरोप....
प्रतिनिधी : संजय पंडित
दि.३० मुंबई : विविध परीक्षेतील गोंधळामुळे सर्वसामान्य नागरिक आणि विद्यार्थ्यांमधून मोठी नाराजी व्यक्त होतेय. अशातच म्हाडाच्या परीक्षेत पुन्हा एकदा गोंधळ झाला आहे का? असा प्रश्न आता उपस्थित केला जातोय. कारण, जानेवारी, फेब्रुवारीमध्ये झालेल्या म्हाडाच्या ऑनलाईन परीक्षेतही गैरप्रकार झाल्याचा आरोप एमपीएससी समन्वय समितीने केलाय. त्याबाबतचा एक सीसीटीव्ही व्हिडीओही समोर आलाय. हा गैरप्रकार औरंगाबादच्या खोडकपुरा भागातील एका शाळेत घडल्याचं बोललं जात आहे. त्यामुळे म्हाडाची परीक्षा पुन्हा एकदा वादात अडकण्याची शक्यता निर्माण झाली आहे. याआधी डिसेंबरमध्ये होऊ घातलेल्या म्हाडा परीक्षेत घोटाळा असल्याची माहिती मिळताच गृहनिर्माण मंत्री जितेंद्र आव्हाड यांनी मध्यरात्री ट्वीट करत परीक्षा पुढे ढकलण्यात आल्याची घोषणा केली होती.
एमपीएससी समन्वय समितीने केलेल्या आरोपानुसार औरंगाबाद शहरातील खोकडपुरा भागातील एका शाळेमध्ये केंद्रसंचालकांशी संगनमत करुन परीक्षेच्या संगणकीय प्रणालीत फेरफार करण्यात आला. याबाबत एमपीएससी समन्वय समितीने पुराव्यासह म्हाडाकडे रितसर तक्रारही केली आहे. या तक्रारीवरुन आता टीसीएस कडून याबाबत स्पष्टीकरण मागवण्यात आलं आहे. कंपनीकडून स्पष्टीकरण आल्यानंतर म्हाडा पोलीस तक्रार करण्याबाबत विचार करेल.
♦️व्हिडीओमध्ये नेमकं काय...?
परीक्षा होण्यापूर्वी दोन व्यक्ती परीक्षा केंद्रात प्रवेश करताना एका व्हिडीओमध्ये पाहायला मिळत आहे. तर एका व्हिडीओमध्ये तीन व्यक्ती परीक्षा होणार असलेल्या वर्गात येतात. त्यातील एकजण खुर्चीवर चढून सीसीटीव्हीजवळ काही करत असल्याचं पाहायला मिळत आहे. त्यानंतर दोघेजण कम्प्यूटरसमोर बसून काहीतरी करत आहेत. पुढे आधीचीच व्यक्ती पुन्हा एकदा सीसीटीव्हीजवळ येत काही करत असल्याचं दिसून येत आहे. त्यानंतर अजून एका व्हिडीओत परीक्षेवेळीही सुपरवायझर आणि विद्यार्थी गप्पा मारताना दिसून येत आहेत. महत्वाची बाब म्हणजे या मुलांचा रोल नंबर अन्य ठिकाणी असून त्यांना या सेंटरवर जागा देण्यात आल्याचा आरोपही करण्यात आलाय.
म्हाडाच्या ५६५ रिक्त पदांसाठी डिसेंबरमध्ये होणाऱ्या परीक्षेत गैरप्रकार झाल्यानं परीक्षा रद्द करण्याचा निर्णय झाला. या प्रकरणी गुन्हाही दाखल करण्यात आला. पुढे हा गैरप्रकार टाळण्यासाठी म्हाडाने टीसीएसच्या माध्यमातून ऑनलाईन पद्धतीने परीक्षा घेण्याचा निर्णय घेतला. मात्र, आता ऑनलाईन परीक्षेतही गैरप्रकार झाल्याचा संशय व्यक्त केला जात असल्यानं विद्यार्थ्यांकडून नाराजी व्यक्त केली जातेय.
stay connected